“ Ammentos de Palas a Deus “
     
                        ( Via Fratelli Cajroli)


Una carrela b’est in coro meu,
sa mezus gioventude b’hat lassadu,
tottu divesciu da i su ‘arigadu,
in s’uttorinu, ‘e Palas a Deu’.

Sas campanas de cheja repicchende,
su ciulare de sos fufferarzos,
da i sos furros fumentos de chivarzos,
in s’ istìu bajanas bargadende.

Ortulanos dende tent’ a tzappare,
birduras da i s’ istju a beranu
e pitzinnos cun-d una pompa a manu,
pienende sa baltzitt’ ‘e ischiginare.

Sas broccas in su cantar’ assentadas,
passaian sas ebbas trottizende
cun sos puddedros fattu annijende,
sas puddas fuian disisperadas.

Su nott’ in sos gianniles contascende,
sos betzos istraccos pasaian,
felices tottu cantu miraian,
sos paggios culi-lùghes pessighende.

A boltas be-i pass’ a sa eretta,
pighende in su largu ‘e “Sa Tanca”,
s’ispettaculu como be-i manca’,
ch’ in cùe faghiat su circu ‘e “Zanfretta”.

Mi ‘enit sa  gàna ‘e mi frimmare,
modernas sas carrelas allijàdas,
ma tottu sas giannas sun serradas,
e mi ch’ essit sa ‘òza ‘e be-i tzoccare.

A unu  ‘oe  primmu sas vetrinas,
cun sabores de mandigu essende,
pitzinnos in carrela gioghittende,
de bona musa tottu sas bighinas.

In segus jà  be-i cherìa torrare,
cosa bella s’ amment’ ‘e su passadu,
su chi contat no  haer ismentigadu,
e-i  s’ispèra de sèmper  mezorare.


             
            
Ithiri, Santu Ajne de su duamiza e battoro
            
                             Romanu  Adriani  Lay