Da-i sa presse non m’ asa saludadu!!!
Che frade tou de lampadas su sese,
in-d una losa postu ch’ as sos pese,
e-i sa Pro-Loco orfana as lassadu.

Cantas cosas faghimis cun amore,
fintzas pro nos ponner in binariu,
deo da-i su “Partidu Proletariu”,
tue da-i sa “Fiàma Tricolore”.

Fut un’ ispant’ a nos bider umpare
e non faddimis mai un approdu,
sos politicos  poniant su nodu:
Cussos duos no ant a isbagliare?

De sas bideas nostras su rispettu,
chentz’ unu francu mai nde fruìre,
sa ‘idda la faghimis divertire.
Inzerr’ a tott’ a bogare suspettu.

Inventadu aimis festas mannas,
e-i sos carros de Carrasegare,
dilettantes modernos a cantare,
sonos antigos cun cordas e cannas.

Ma s’ amore tou fut sa trachite,
cun sa Pro-Loco nàschet “ Sa biennale”,
tue fusti su cabu originale,
e ti che ses andadu. Ma proìte?

Proìte custa presse a ti ch’ andare,
asa lassadu boìda sa tana,
chentza e tè no amus pius gana,
de atterùna cosa ‘e imbentare.

In cùccuros de nùes, b’ iscummìtto,
cosas nòas nde ses ammanitzende
pro nòis,.. ca nos ses aisettende,
e jà pigamus tottu,... tardu o chitto!!!…
“ Proìte custa presse
                                                       Ithiri,  Martu  duamiza e chimbe

                                                                                 
Romanu  Adriani Lay
In ammentu de Cicciu  Carta  * 22/02/1937 + 05/06/2004