Sa pisedda rascadora

2° Classificata al:

Concorso Letterario “Limba e Ammentos” del 16/12/2005 di Ittiri.
Ittiri Cannedu,  in s’Atunzu de su duamiza e chimbe

                               Romanu  Adriani  Lay
S’istajone comintzat in beranu,
pro s’antiga pisedda rascadora,
su manzanu partit a bon’ora,
cun bottas russas e tzappitt’in manu.

Poi daghi sa fae s’est sicchende,
andat a campagna a la ‘ogàre,
ma su linu b’es’ puru ‘e trabagliàre,
e che passat s’istìu argadende.

Su massaju finit de messare,
sa terra,’ogat pampàdas de calòre,
pro s’ultimu ranu ‘e su laòre,
partit a bon’ora a irrestujare.

Sos riccos in su mare sun gosende,
ma issa no’ at tempus de pasàre,
ch’ essit a s’ impuddil’ a binnennàre
e che passat  sa notte sujghende.

Tres istajones che sun’ ‘arigàdas,
como be-i nde restat un ebbìa,
e che la passat accogliend’olia,
cun sas manos sèmper  cancaràdas.

Pro su frittu totta cavaccada,
ma puru pro su sensu ‘e su pudore,
s’ammustrat sa carrùga es’ disonore,
e dai sos mannos benit criticada.

Ite bellesa fut a la mirare,
a brocca in conca cun su cuccurìle,
tèttera che canna ‘e fusile,
carrende s’abba ‘ona pro buffare.

Como chi ses diventada nonna,
netta tua faghet sa velina,
mustrende còscia longa e mudandina,
e immutzat sèmper pius sa minigonna.

Ite differentzia in chimbant’annos,
su modernu da-i su passadu,
riccu e pover’ hat  apparinadu,
chi sigat  gàlu gài chentza dannos.

Sa pisedda ‘e primmu, rascadora,
chi como giamamus signorina,
fut elegante che i sa velina,
e dignitosa che una signora.

Signorina moderna crèe a mie,
com’ asa tottu:- cremas e massaggios,
puru prima, cun tottu sos disagios,
nonna tua fut bella che a tie.