Sentidos giogarìtzos


“Premio Logudoro” il 14 /12/ 2008  "Segnalazione di merito"
                         Ittiri Cannedu, Abrìle  duamiza e otto

                               Romanu  Adriani  Lay
A s’ abèrta ‘e s’ oju su manzànu
cun sa carèna torr’ affortigàda
rèos pro aterùna zoronàda
che puzònes anìscos in berànu,
cun su primmu sentidu soberànu
de nos contivizàre sa criàda.


Su ris’ in laras giughet s’ avreschìda,
sentidos e chimèras a cunsònu
dainànti ‘e ojos a s’ indònu
giogan briòsos, ma non totta vida,
ca puru ‘e cosas malas est fiorìda
sa tessidur’ in conca a s’ arrejònu..


Arcànos meda suni sos sentidos
chi giogan in tzelèmbros de sa zente,
amor’ e odiu brìncan in sa mente:
amigos òe deris abburrìdos,
astiàdos àteros prim’ accarìdos
ca sos umores mùdan de repènte.


E meda s’ ischervèdden sos poètas
a seliàre in rimas sos sentidos
chi rùjan in chervèddos abbramìdos
e rènden sas persones inchiètas.
Mai sun resessìdos sos profètas
addevinare giogos incubìdos.

Amus imbìdia pro chi est pius bellu
o chi de nois est pius balente,
o adoramus calchi prepotente
chi de sa greffa est su pius rempèllu,
intoppendel’ asciamus su cappellu
cun sentidos merìssios mascamente.


Sentidos de amore pro sos fizos,
chi prus mannos non nd’ amus in natura,
da-i su naschimentu a sepoltura
babb’ e mama los custòin che lìzos,
fintzas a giughere pigias in sos chìzos
ampàru de s’ issòro criadura.


In sas calàncas, giogan sos sentidos,
de sa sièntzia e la chìntan in tundu,
isforròjana  s’ animu in profundu,
bisionende contàdos mai ‘idos,
chi pùnnana a melèdos trobeìdos
e giàmbana s’ andàina ‘e su mundu.